Os gofyn rhywun beth yw Duw

Os gofyn rhywun beth yw Duw,
atebwn ni mai cariad yw:
fe fflamiodd cariad Tri yn Un
yn rhyfedd at annheilwng ddyn.

Nid dim rhinweddau ynom ni
na dim a wnaed ar Galfarî
fu’n achos iddo garu dyn,
fe’i carodd er ei fwyn ei hun.

Fe’n carodd, ac fe’n câr o hyd,
ymhob rhyw drallod yn y byd;
a’r rhai a garodd ef un waith,
fe’u câr i dragwyddoldeb maith.

AZARIAH SHADRACH, 1774-1844

(Caneuon Ffydd 171)