logo

Ein gwefannau eraill: ysgolsul.com beibl.net gair.cymru

gobaith.cymru

Disgleiried golau’r groes

Disgleiried golau’r groes
ar uchelfannau’r byd;
aed Mab y Dyn o oes i oes
yn fwy ei fri o hyd.
Gogoniant byth i’r Oen,
ar aur delynau’r nef:
ei groes sy’n gwella’r byd o’i boen –
gogoniant iddo ef!

Doed gorseddfeinciau’r byd
dan ei awdurdod bur,
a doed y bobloedd o un fryd
i’w garu am ei gur.
Gogoniant byth i’r Oen,
ar aur delynau’r nef:
ei groes sy’n gwella’r byd o’i boen –
gogoniant iddo ef!

Pob trais a gormes mwy
ddarfyddo is y ne';
dan ddylanwadau marwol glwy’
mae’r byd i ddod i’w le.
Gogoniant byth i’r Oen,
ar aur delynau’r nef:
ei groes sy’n gwella’r byd o’i boen –
gogoniant iddo ef!

Tywynned golau’r groes
i ddyfnder tlodi dyn,
gan ddangos gobaith dod, drwy’r loes,
ar ddelw Duw ei hun.
Gogoniant byth i’r Oen,
ar aur delynau’r nef:
ei groes sy’n gwella’r byd o’i boen –
gogoniant iddo ef!

ELFED, 1860-1953

(Caneuon Ffydd 265)

PowerPoint
  • Gwenda Jenkins,
  • April 29, 2015